Hukumar Zaɓe Mai Zaman Kanta ta Ƙasa (INEC) ta sanar da maido da Mazabar Aujara a Jihar Jigawa bayan hukuncin kotu da ya umarci dawo da wasu mazabu da aka dakatar a jihohin Benue, Delta, Jigawa da Kogi.
Da wannan mataki, yawan kujerun Majalisar Dokokin Jihar Jigawa ya karu daga 30 zuwa 31, inda al’ummar Aujara za su sake samun wakilci a majalisar.
INEC ta bayyana cewa maido da mazabar ba sabon shiri na siyasa ba ne, illa aiwatar da hukuncin kotu da kuma tabbatar da cewa dukkan yankuna sun samu damar wakilci a babban zaɓen 2027.
Hukumar ta kuma sanya ranakun 16 zuwa 25 ga Yuni, 2026 domin jam’iyyun siyasa su gudanar da zaɓen fidda gwani a mazabun da aka maido. Mazabar Aujara ita kaɗai ce aka ambata daga Jihar Jigawa a cikin sanarwar da hukumar ta fitar.