Hukumar kula da harkokin wasannin ƙwallon ƙafar Turai UEFA, ta fara zaman ladabtarwa kan ƙungiyoyin Barcelona, Real Madrid da Juventus kan shigarsu a yinƙurin ƙirƙiro da gasar cin kofin Super League.
Ƙungiyoyin dai na cikin jerin ƙungiyoyi 12 da suka yi yinƙurin ɓullo da gasar, saidai tuni 9 daga cikinsu suka sanar da ficewa daga tsarin, yayinda aka bar Barcelona, Juventus da Real Madrid.
Uefa ta ce ta fara zaman yadda za a ladabtar da ƙungiyoyin uku, bisa zargin karya ƙa’idojin hukumar.
Sanarwar da hukumar ta fitar a ranar Talata, ta ce za ta sanar da karin bayani kan halin da ake ciki a nan gaba kaɗan.