Iran ta sanar da gudanar da atisayen sojan ruwa na harbin kai tsaye (live-fire) na tsawon kwanaki biyu a mashigar Hormuz, wanda zai fara a ranar Lahadi, bayan Amurka ta tura jirgin ruwan yaƙi mai ɗaukar jiragen sama Abraham Lincoln da sauran kayan aikin soja zuwa Gabas ta Tsakiya.
Rundunar sojin Amurka da ke yankin, wato Central Command (CENTCOM), ta fitar da gargaɗi ga sojojin Iran, tana mai cewa ba za ta lamunci “motsin da ba su da tsaro” ba, kamar tashi da jiragen sama a saman jiragen ruwan yaƙin Amurka ko kusantar ƙananan jiragen ruwan Iran cikin hanyar karo da jiragen Amurka.
Tashin hankali ya ƙaru na makonni tsakanin Tehran da Washington sakamakon barazanar da shugaban Amurka Donald Trump ke yi akai-akai na kai wa Iran hari, bisa zargin matakan da ta ɗauka kan zanga-zangar adawa da gwamnati da kuma ƙoƙarinsa na dakile shirin nukiliyar Iran.
Ministan harkokin wajen Iran, Abbas Araghchi, ya ce a ranar Juma’a cewa ƙasarsa a shirye take ta shiga tattaunawa “mai adalci da gaskiya,” amma ya ƙi amincewa da manyan buƙatun Trump. Araghchi ya jaddada cewa dabarun tsaro da tsarin makamai masu linzami ba za su taɓa zama batun tattaunawa ba.