Majalisar Wakilai ta Najeriya ta sanar cewa za ta koma zama na gaggawa a ranar Talata domin tattauna muhimman batutuwa da suka shafi jadawalin zaɓen shekarar 2027.
Wannan mataki ya biyo bayan sanarwar da Hukumar Zaɓe Mai Zaman Kanta ta Kasa, wato Independent National Electoral Commission ta fitar kan ranakun gudanar da zaɓukan gaba.
Shugaban hukumar, Farfesa Joash Amupitan, ya bayyana cewa za a gudanar da zaɓen shugaban ƙasa da na Majalisar Tarayya a ranar 20 ga Fabrairu, 2027.
Haka kuma ya ce zaɓen gwamnoni da na majalisun jihohi za su gudana ne a ranar 6 ga watan Maris, 2027, kamar yadda kundin tsarin mulki da dokar zaɓe ta tanada.
Majalisar Wakilan ta ce ta kira zaman gaggawar ne domin duba muhimman batutuwan doka da suka taso daga wannan jadawali, tare da tabbatar da komai ya bi tsarin dimokuraɗiyya yadda ya kamata.
Rahotanni sun nuna cewa majalisar na son sake duba wasu sassa na dokar zaɓe, musamman batun lokacin sanar da zaɓe, domin a samu sassauci da dacewa da yanayin ƙasa.
Majalisar ta kuma buƙaci dukkan ’yan majalisar su halarci zaman, tana mai jaddada cewa hakan na daga cikin ƙoƙarin ƙarfafa dimokuraɗiyya da kare muradun al’ummar Najeriya.