Dakarun rundunar sojin Najeriya ta 81 Division sun dakile wani yunƙurin satar man fetur tare da kama mutane 14 da ake zargi da aikata laifin a yankin Lekki Free Zone da ke kusa da matatar Dangote a jihar Legas.
A cewar wata sanarwa, dakarun sun gudanar da samamen ne da sanyin safiyar ranar 16 ga Afrilu 2026, bayan samun sahihan bayanan sirri kan ayyukan masu satar man.
Rahoton ya ce an kama waɗanda ake zargin ne yayin da suke tsaka da satar man fetur ta hanyar zare shi daga bututun mai zuwa wata tanka da aka ɓoye a cikin daji.
An bayyana cewa masu laifin sun haɗa wani dogon bututu daga teku zuwa tankar, inda suke amfani da injin famfo mai amfani da janareta domin tura man cikin motar.
Da suka hango zuwan sojoji, waɗanda ake zargin sun yi yunƙurin tserewa, sai dai dakarun suka yi gaggawar cafke su.
Kayayyakin da aka ƙwato daga wurin sun haɗa da babbar motar tankar mai ɗauke da man da aka sata, mota kirar Lexus Highlander, mota kirar Ford Hilux, injin famfo, injin jirgin ruwa mai ƙarfin 40HP, da kuma bututun roba masu yawa da ake amfani da su wajen satar mai.
Rundunar sojin ta jaddada kudurinta na ci gaba da yaƙi da ayyukan satar man fetur da sauran laifuka, tare da tabbatar da tsaron muhimman cibiyoyin tattalin arziƙi a ƙasar.