Sojojin Najeriya sun lalata wani wurin jinya da ’yan ta’adda ke amfani da shi tare da kashe ɗaya daga cikinsu a wani sabon farmaki da suka kai a yankin Arewa maso Yammacin ƙasar nan. Rundunar sojin ta bayyana cewa farmakin na daga cikin ci gaba da hare-haren da ake kaiwa domin raunana ayyukan ’yan ta’adda da katse hanyoyin tallafawar su.
A cewar sojojin, wurin da aka lalata na bai wa ’yan ta’adda damar kula da raunuka da murmurewa bayan kai hare-hare, lamarin da ke ƙara ƙarfafa ayyukansu. Rundunar ta ce lalata cibiyar na da matuƙar muhimmanci wajen rage ƙarfin ’yan ta’adda da dawo da tsaro a yankin.
Sojojin sun jaddada aniyarsu ta ci gaba da kai hare-hare a maɓoyar ’yan ta’adda har sai an tabbatar da zaman lafiya da tsaro ga al’ummar yankin.