An kama shahararren jagoran ‘yan bindiga, Abdu Lankai, wanda ya jagoranci yarjejeniyar zaman lafiya a Karamar Hukumar Jibia ta Jihar Katsina, bayan rikici da wata kungiya da ke adawa da yarjejeniyar.
Rahotanni daga yankin sun ce akalla ‘yan bindiga bakwai daga cikin mutanensa sun mutu, yayin da wasu da dama suka jikkata sakamakon artabun da ya biyo bayan taron da aka yi da kungiyoyin adawa.
Majiyoyi sun bayyana cewa wasu daga cikin ‘yan bindigar da suka tuba, wadanda biyayya ga Lankai, sun samu raunukan harbin bindiga, inda aka ce mutum biyu na cikin mawuyacin hali a wani asibiti dake Katsina.
Abdu Lankai ya shahara a tsakanin ‘yan bindiga na sassan Zamfara da Maradi a Jamhuriyar Nijar, bayan amincewa da yarjejeniyar da ta hana kai hare-haren makamai a Karamar Hukumar Jibia.
Jibia na daga cikin kananan hukumomi na farko a Katsina da suka kulla yarjejeniyar zaman lafiya da ‘yan bindiga, duk da cewa wasu shugabannin kungiyoyin, ciki har da Dogo Rabe da Black, sun yi watsi da shirin tare da hada kai da shahararren jagoran ‘yan bindiga Bello Turji.
Rahotanni sun ce an shirya taron sasanton ne a ranar Talata, 27 ga Janairun 2026, da nufin jawo Lankai, amma taron ya rikide zuwa rikici bayan mutanen Dogo Rabe sun kai masa hari, suka kashe wasu daga mutanensa tare da kama shi da rai.
Lamarin ya tayar da hankula a Jibia, inda shugabannin al’umma ke cewa fargaba na karuwa, yayin da masana tsaro ke kira da a sake duba yarjejeniyoyin zaman lafiya domin kare zaman lafiya.