Almajirai 4 Sun Mutu A Kano Bayan Cin Kifin Da Ake Zargin Ya Gurɓata
Almajirai huɗu sun mutu a Kano bayan cin kifin da ake zargin ya gurɓata, yayin da wani ɗalibi guda ke karɓar magani a asibiti.
Marigayin sun haɗa da Abdulfatah Mohammed, mai shekaru 15; Yusuf Nuhu, 16; Buhari Iliyasu, 14; da Ibrahim Muhammad, 22. Wani ɗalibi, Auwalu Surajo, mai shekaru 18, ya tsira kuma yana samun kulawa a asibiti.
Ɗaliban sun kasance a makarantar Tsangaya ta Gwani Malam Iliyasu Mai Tsangaya da ke Kadage Sharifai, ƙaramar hukumar Ungogo a Jihar Kano.
A cewar wata sanarwa da Shugaban Ƙungiyar Tsangaya Media Network, Gwani Sani Musa Nuhu, ya fitar, an garzaya da ɗaliban zuwa Asibitin Koyarwa na Aminu Kano (AKTH) bayan sun kamu da rashin lafiya sakamakon cin abincin da ake zargin ya gurɓata.
Sanarwar ta ce daga bisani ɗaliban huɗun sun rasu a asibitin a daren Lahadi, 16 ga Agusta.
Sai dai ba a bayyana irin gurɓataccen abu da ake zargin ya jawo mutuwar ɗaliban ba.
Wani abokin marigayin, Malam Surajo Unguwar Gareji, ya shaida cewa yana wurin lokacin da ɗaya daga cikin ɗaliban ya fito da kifin da misalin ƙarfe 7:00 na safe. Ya ce sun fara cin kifin tare, amma ya daina bayan ya ɗanɗana shi saboda ya lura cewa ɗanɗanonsa ba daidai yake ba.
Shi ma wani abokinsu mai suna Malam Umar ya ce ya ƙi cin kifin saboda ya yi zargin cewa ba shi da lafiya.
A cewarsa, jim kaɗan bayan ɗaliban sun ci kifin, huɗunsu suka suma tare da fama da matsananciyar rashin lafiya. Daga nan aka sanar da malaminsu, wanda ya shirya kai su asibiti.
Malam Iliyasu, wanda yake kula da makarantar Tsangayar, ya tabbatar da faruwar lamarin, yana mai bayyana shi a matsayin babban bala’i da ya shafi makarantar, iyalan marigayin da kuma al’ummar Musulmi baki ɗaya.
’Yan sanda sun fara bincike
Rundunar ’yan sandan Jihar Kano ta tabbatar da faruwar lamarin, inda ta ce ta fara bincike domin gano ainihin abin da ya haddasa mutuwar ɗaliban.
Mai magana da yawun rundunar, SP Abdullahi Kiyawa, ya ce marigayin ’yan asalin ƙaramar hukumar Sule Tankarkar ne ta Jihar Jigawa, kuma sun je Kano ne domin karatun Alƙur’ani da haddace shi.
Ya ce rundunar za ta sanar da jama’a sakamakon binciken da zarar an kammala shi.
Daga bisani an binne gawarwakin marigayin bisa tsarin addinin Musulunci bayan samun izini daga Dagaci da hukumomin ’yan sanda na yankin.
Likita ya yi bayani kan gubar abinci
Wani likita a Kano, Dr Usman Abdullahi Nagogo, ya bayyana gubar abinci a matsayin rashin lafiya da ke faruwa sakamakon cin abinci ko shan ruwa da ya gurɓata da ƙwayoyin cuta, ƙwayoyin cuta masu yaɗuwa ko wasu gubobi.
Ya ce alamomin gubar abinci na iya haɗawa da tashin zuciya, amai, gudawa, ciwon ciki, zazzabi da rauni, kuma alamomin na iya bayyana cikin mintuna ko sa’o’i bayan cin abincin, ko kuma su ɗauki kwanaki kafin su bayyana.
Likitan ya shawarci jama’a da kada su yi ƙoƙarin magance wanda ake zargin ya sha guba da wasu magungunan gida ko tilasta masa yin amai ba tare da umarnin ƙwararren likita ba.
Ya ce duk wanda ake zargin ya kamu da gubar abinci ko wani abu da ba a san ko guba ba ne, ya kamata a garzaya da shi asibiti nan take, tare da adana abincin ko abin da ake zargin ya jawo matsalar domin hukumomin lafiya su bincika.