Gwamnatin Tarayyar Najeriya ta bayyana shirinta na sake ciyo bashin dala biliyan 1.75 daga Bankin Duniya. Wannan matakin na zuwa ne duk da cewa gwamnati ta samu karin kudaden shiga daga bangarorin da ba su da alaƙa da man fetur da kaso 40 cikin 100 a cikin watanni takwas na shekarar 2025.
Fadar shugaban kasa ta bayyana wannan ci gaba a ranar Laraba, inda ta ce tattalin arzikin kasar na samun karin kudaden shiga daga hanyoyin da ba na man fetur ba, abin da ke nuna nasarar wasu tsare-tsaren tattalin arzikin gwamnati. Wannan karin kudin shiga na nuni da cewa Najeriya na samun sauyi daga dogaro da fetur kadai wajen samun kudaden shiga zuwa wasu fannoni daban-daban kamar haraji, kwastam duty da kudaden shiga daga hukumomin gwamnati.
Sai dai binciken da jaridar Punch ta gudanar ya nuna cewa duk da wannan karin kudaden shiga, akwai manyan wuraren gibin da ake bukatar a cike su. Musamman, bangaren ayyukan gine-gine na kasa na fama da rashin isassun kudade. Kungiyar ‘yan kwangila na cikin gida sun gudanar da zanga-zangar neman a biya su kudaden da gwamnati ke binsu tun shekarar 2024, wanda jimillar adadin bashin ya kai kusan Naira tiriliyan 4.
Duk da haka, masana na ganin akwai damuwar cewa karin bashin zai iya kara nauyin bashi a kan tattalin arzikin kasar, wanda ya riga ya sha fama da nauyi daga wasu basussuka na baya.