Katsina United Ta Tabbatar Da Rasuwar Ozor, Ta Musanta Rahotannin Cewa Ya Farfaɗo
Ƙungiyar ƙwallon ƙafa ta Katsina United ta tabbatar da rasuwar sabon ɗan wasanta, Chinedu Ozor, tare da musanta rahotannin da suka ce ɗan wasan ya farfaɗo bayan an kai shi gidan ajiye gawa.
Ozor ya faɗi yayin wasan sada zumunta tsakanin Katsina United da Niger Tornadoes a filin wasa na Muhammadu Dikko da ke Katsina ranar Talata, lamarin da ya kai ga garzaya da shi asibiti.
Katsina United ta ce duk da ƙoƙarin ceto rayuwarsa, ɗan wasan bai farfaɗo ba kuma ya rasu.
Kulob ɗin ya bayyana cewa rahotannin da suka ce an gano alamun rai a jikinsa a gidan ajiye gawa sun samo asali ne daga ƙoƙarin iyalansa na neman ƙarin tabbatar da halin da yake ciki kafin kai gawarsa ɗakin ajiye gawa.
Katsina United ta kuma roƙi jama’a da kafafen yaɗa labarai da su daina yaɗa rahotannin da ba a tabbatar da su ba, tana mai cewa irin waɗannan labarai na ƙara wa iyalan marigayin ciwo da damuwa.
A cewar kulob ɗin, “bai farfaɗo ba. Ya rasu.”
Rasuwar Ozor ta jefa abokan wasansa, tsoffin kungiyoyinsa da kuma al’ummar ƙwallon ƙafa cikin jimami.
