Shugaban Majalisar Dattawa, Sanata Godswill Akpabio, ya yi watsi da zargin da ke yawo cewa an yi canji ga sababbin dokokin haraji bayan Majalisar Tarayya ta amince da su, yana mai cewa zargin ba shi da tushe balle makama.
Akpabio ya bayyana hakan ne a yayin zaman Majalisar Dattawa, a matsayin martani ga ikirarin da ɗan Majalisar Wakilai, Abdussamad Dakuku, ya yi cewa an sauya wasu sassa na dokokin bayan kammala aikin majalisa.
Ya ce dokokin harajin da aka wallafa a jaridar gwamnatin tarayya, kuma Shugaban Ƙasa ya sanya wa hannu, sun yi daidai kacokan da ƙudurorin da ’yan majalisa na ɓangarorin biyu—Majalisar Dattawa da Majalisar Wakilai—suka amince da su.
Shugaban majalisar dattawan ya jaddada cewa duk wata takarda ko bayani da ba Majalisar Tarayya ce ta fitar da shi ta hanyoyin da doka ta tanada ba, ba za a ɗauke shi a matsayin sahihi ba.
Akpabio ya ƙara da cewa dokokin sun fito ne bayan dogon nazari da tattaunawa a majalisun biyu, inda aka sasanta dukkan bambance-bambancen ra’ayi kafin a kammala aikin.
Ya bayyana cewa dokoki huɗu da suka shafi haraji sun bi dukkan matakan da kundin tsarin mulki ya tanada—daga amincewar majalisa, zuwa sanya hannu daga Shugaban Ƙasa, har zuwa wallafawa a hukumance.
Sanata Akpabio ya yi gargaɗi kan yaɗa dokoki ta hanyoyin da ba na hukuma ba, yana mai cewa hakan na iya haifar da ruɗani, jita-jita da kuma yaɗa bayanan ƙarya ga jama’a.
