Majalisar zartarwa ta jihar Jigawa ta amince da kwangilar naira biliyan 2 a ma’aikatar ilimi

Majalisar zartarwar jihar Jigawa ta amince da kwangilar kimanin naira biliyan biyu don aiwatar da ayyuka a ma’aikatar ilimi, kimiyya da fasaha.

Hakanan, majalisar ta amince da sama da Naira miliyan 119 ga Hukumar Ilimin makiyaya don aiwatar da ayyuka a makarantun makiyaya.

Kwamishinan Matasa, Wasanni da Al’adu, Bala Ibrahim ne ya sanar da hakan yayin da yake yiwa manema labarai karin haske bayan taron mako-mako na majalisar wanda Gwamna Muhammad Badaru Abubakar ya jagoranta a Dutse.

Kwamishinan ya kara da cewa an kuma ware wasu kudi kimanin naira miliyan 420 domin gina sabbin bandakunan zamani guda 13 da famfunan hannu guda 11 a makarantun Ilimin Addinin Musulunci, da gyarawa, shingen bango da guraren girki a Makarantar Sakandaren Gwamnati ta Kaugama da Gwamnati. Makarantar Sakandare ta ‘Yan mata dake Danzomo.

Bala Ibrahim ya ci gaba da sanar da amincewar majalisar na sama da naira miliyan 437 domin samar da kujeru a Makarantun Firamare da na Karamar Sakandire dake fadin jiharnan.