Maleriya Taci Gaba da Zama Barazana Ga Lafiyar Jama’a da Tattalin Arziki a Jahar Jigawa

Bincike ya tabbatar da cewa a duk shekara al’ummar jihar Jigawa na fuskantar babban kalubale na kashe kuɗade masu yawa sakamakon cutar zazzabin cizon sauro wato maleriya. Wannan cuta ta dade tana zama barazana ga lafiyar jama’a, musamman ma a lokacin damuna, lokacin da sauro ke yawaita saboda tabkeken ruwa da ke zama matsugunninsu.

Maleriya ba kawai tana jawo rauni da ciwo a jikin mutum ba, har ila yau tana rage ƙarfin aiki da noman jama’a, musamman ga manoma waɗanda su ne kashin bayan tattalin arzikin jihar. Idan mutum ya kamu da maleriya, yana bukatar lokaci da kuɗi wajen neman magani, wanda hakan ke haifar da asarar kudade da kuma tsaikon ayyukan yau da kullum.

A bangaren kuɗi, iyalai masu ƙaramin ƙarfin tattalin arziki su ne mafiya shan wahala. Saboda yawanci sukan kashe kudin da suka tanada don abinci ko ilimi wajen neman maganin maleriya. Hakan yana jawo koma baya a cigaban tattalin arzikin gida da kuma jefa wasu iyalai cikin ƙarin talauci.

Haka kuma, binciken ya nuna cewa yara ƙanana da mata masu juna biyu su ne mafiya fuskantar haɗarin mutuwa sakamakon maleriya. Wannan kuwa yana jawo yawan mace-macen mata a lokacin haihuwa da kuma mutuwar yara kafin su kai shekara biyar.

Gwamnati da kungiyoyi masu zaman kansu sun yi ta ƙoƙari ta hanyar raba rigar kwanciya mai maganin sauro, wayar da kan jama’a akan tsaftar muhalli, da kuma samar da magungunan maleriya a cibiyoyin kiwon lafiya. Duk da haka, har yanzu cutar na ɗaya daga cikin manyan matsalolin kiwon lafiya da ke jawo asarar rayuka da kuɗaɗe a jihar.

A takaice, maleriya ta zama barazana mai girma ga lafiyar jama’a da tattalin arzikin iyalai a Jigawa. Don haka akwai buƙatar ƙara maida hankali wajen rigakafi da kuma samar da hanyoyin magani masu araha da inganci, domin rage illolinta ga al’umma.