Jam’iyyar New Nigerian Peoples Party (NNPP) a Jihar Kano ta bayyana matuƙar damuwa da ɓacin rai kan sauya sheƙar da Gwamna Abba Yusuf ya yi zuwa jam’iyya mai mulki ta All Progressives Congress (APC).
Da yake magana a wata hira a shirin Politics Today na tashar Channels Television, wanda DAILY POST ta sanya ido a kai a ranar Litinin, kakakin jam’iyyar NNPP a jihar, Ibrahim Karaye, ya ce sun ji matuƙar baƙin ciki tare da jin an yaudare su.
Gwamna Yusuf ya koma jam’iyyar APC a hukumance a ranar Litinin, bayan da ya fice daga NNPP a ranar Juma’a.
Da yake martani kan sauya sheƙar, Karaye ya ce:
“Mun shiga matuƙar baƙin ciki. Mun ji an yaudare mu, kuma ba mu ji daɗin wannan lamari ba. Amma duk da haka, NNPP har yanzu jam’iyya ce mai ƙarfi, kuma ita ce jam’iyyar da za ta ci gaba da kasancewa a Kano, domin tun daga lokacin da gwamnan ya fara shirin barin jam’iyyar, duk manyan masu ruwa da tsaki sun san abin da yake yi.
“Amma a siyasa, ba za ka iya yanke shawara kai kaɗai ba tare da ɓangare na biyu ya ɗauki matsayinsa ba. Bai yi wani abu ba a wancan lokacin, shi ya sa muka ci gaba da jiran sa har zuwa ranar Juma’ar da ta gabata, lokacin da ya mika takardar barinsa daga jam’iyyarmu.
“Bayan fitarsa daga jam’iyyar, mun yi tsammanin zai koma wata jam’iyya mafi ci gaba da ƙwarewa, ganin cewa daga cikin dalilan da ya bayar na barin NNPP akwai rikicin cikin gida.
“Zan iya tabbatar muku cewa babu wata jam’iyyar siyasa a Najeriya da ba ta da rikicin cikin gida. Ko a nan Kano, jam’iyyar APC da ya koma, tana da rikice-rikice da matsaloli masu yawa, amma ai siyasa ce.”
