Shugaba Buhari ya aike da karin kasafin kudi na Naira biliyan 819 ga Majalisa domin amincewa
Shugaban Kasa Muhammadu Buhari ya aike da karin kasafin kudi na Naira biliyan 819.5 ga Majalisar Dokoki ta Kasa domin amincewa.
Ana sa ran za a bai wa kasafin lamuni ta hanyar samun kudaden cikin gida.
Hakan zai kara gibin kasafin kudin zuwa Naira tiriliyan 8.17.
A cewar wata wasika da Kakakin Majalisar Wakilai, Femi Gbajabiamila ya karanta a zauren majalisar ranar Laraba, karin kasafin kudin zai magance matsalar abinci, biyo bayan mummunar ambaliyar ruwa da aka samu a fadin kasar nan da kuma tabarbarewar tattalin arziki.
Shugaban ya ce an tsara karin kasafin ne kan bukatar kammala muhimman ayyukan Gwamnatin Tarayya da take yi, kamar ayyukan madatsun ruwa da manyan hanyoyi.
A ranar 31 ga watan Disamba, 2021 Buhari, ya rattaba hannu kan kudirin kasafin kudin 2022 na Naira tiriliyan 17.126 bayan da babban mai taimaka masa na musamman kan Majalisar Dattawa, Sanata Babajide Omoworare, ya gabatar a zauren majalisar.
