Shugaban hukumar yaki da cin hanci da rashawa ta Najeriya (EFCC), Olanipekun Olukoyede, ya bayyana jihar Zamfara a matsayin misali na sauyin ci gaba karkashin jagorancin Gwamna Dauda Lawal.
Olukoyede ya bayyana hakan ne yayin gabatar da jawabin bude taron lacca na bikin cika shekaru 30 da kafa jihar Zamfara, wanda aka gudanar a fadar gwamnatin jihar da ke Gusau.
Ya ce ya gudanar da bincike kan jihar da gwamnan kafin ya amince da gayyatar halartar taron.
Shugaban EFCC ya bayyana cewa, duk da ka’idojin aikin da ke bukatar ya nisanci halartar tarukan siyasa, sauye-sauyen da ya lura da su a Zamfara sun sa ya amince da gayyatar.
Ya ce daga cikin abubuwan da suka burge shi akwai sabon filin jirgin sama, hanyoyin mota da aka gyara tare da shimfida musu kwalta, da kuma sanya fitilun hasken rana a kan titunan Gusau.
Olukoyede ya kuma yaba wa gwamnatin jihar kan inganta sakamakon dalibai a jarrabawar kammala sakandare ta NECO da WAEC.
A nasa jawabin, Gwamna Dauda Lawal ya ce taken taron, “Nazari kan nasarori da kuma makomar jihar”, an tsara shi ne domin duba kalubalen da suka addabi Zamfara da hanyoyin samar da kyakkyawar makoma.
Ya ce an tattauna batutuwan da suka hada da rikon amana, shigar al’umma cikin yaki da rashin tsaro, kare tarihi da al’adu, da kuma alakar tsaro da ci gaban tattalin arziki.
Gwamnan ya ce shirin gwamnatinsa mai ginshikai shida na ceto jihar da kuma tsarin bunkasa Zamfara na shekarar 2025 zuwa 2034, su ne tubalan da za su taimaka wajen magance matsalolin jihar da samar da ci gaba mai dorewa.
Ya bukaci masu ruwa da tsaki da su tabbatar da cewa alkawuran da aka dauka sun haifar da sauye-sauyen da za a iya gani a rayuwar al’umma.
Taron ya kuma samu gabatarwar masana da suka hada da Farfesa Tijjani Muhammad Bande, Farfesa Sulaiman Kura, Farfesa Murtala Rufai da Farfesa Taofik Aminu.
