Amaechi ya ce a zamaninsu suna kalubalantar gwamnati tare da yin kira ga shugabanci mai gaskiya

Tsohon Ministan Sufuri, Rotimi Amaechi, ya bayyana cewa shi da tsohon Gwamnan Jihar Jigawa, Sule Lamido, da sun tunkari Shugaba Bola Tinubu game da yadda Najeriya ke tafiya a yanzu da ace har yanzu suna kan kujerun gwamnoni.

Amaechi ya bayyana hakan ne a Abuja ranar Talata yayin kaddamar da littafin tarihin rayuwar Lamido mai suna Being True to Myself.

Ya ce a zamaninsu, su na taka rawar gani wajen kalubalantar gwamnati tare da yin kira ga shugabanci mai gaskiya, kuma sun kasance masu jajircewa wajen kawo sauyi. Ya ce da ace su ne gwamnoni a yanzu, da ba za su zura ido su ga abin da ke faruwa ba, saboda a lokacin su, an san su da tsayawa kyam wajen kare muradun al’umma.