Daliban Jami’ar Tarayya Dake Gusau Sun Samu Yanci Bayan Shafe Kwanaki 12 A Hannun Masu Garkuwa
Dalibai mata biyu na Jami’ar Tarayya da ke Gusau a Jihar Zamfara sun samu ‘yanci bayan sun shafe kwanaki 12 a hannun masu garkuwa da mutane.
An yi garkuwa da daliban ne bayan wasu ‘yan bindiga dauke da makamai sun kutsa cikin gidansu da ke unguwar Sabon Gida.
Kungiyar daliban jihar Zamfara ta sanar da sakin daliban amma ba ta bayyana ko an biya kudin fansa ba.
Sauran daliban sun yaba da irin jajircewar da mahukuntan makarantar suka yi wajen ganin an sako daliban da aka sace.
Hukumar makarantar ta yaba da kokarin ’yan uwan daliban da suka yi na addu’o’i, da kuma sauran ‘yan uwa saboda sha’awarsu, na hadin kai da kuma taimako wajen ganin an sako daliban da aka sace. Hukumar ta yi kira ga jami’an tsaro da su tabbatar da kamawa tare da gurfanar da wadanda suka aikata wannan aika-aika da masu daukar nauyin wannan aika-aika, duk tsawon lokacin da aka dauka, tare da tabbatar da cewa wannan lamari bai kara faruwa da wani dalibin.
